Abre o prazo para solicitar as prácticas Blue Book da Comisión Europea
A nova convocatoria incorpora por primeira vez unha modalidade específica para persoas tituladas en Formación Profesional
Xa está aberto o prazo para solicitar as prácticas Blue Book da Comisión Europea, unha oportunidade para adquirir experiencia profesional nun contorno internacional e coñecer de primeira man o funcionamento das institucións e da elaboración das políticas europeas.
O programa ofrece prácticas remuneradas de cinco meses na Comisión Europea e noutros servizos e organismos asociados. As persoas seleccionadas traballan nun contorno multicultural e poden desenvolver competencias profesionais ao tempo que coñecen o funcionamento da administración e das políticas da Unión Europea.
A principal novidade desta convocatoria é a incorporación dunha modalidade específica para persoas tituladas en Formación Profesional (FP). Así, o programa conta actualmente con tres modalidades: prácticas administrativas para titulados universitarios, prácticas administrativas para titulados de Formación Profesional e prácticas de tradución.
A modalidade para titulados de FP está orientada á adquisición de experiencia práctica relacionada coa súa formación. As persoas seleccionadas desenvolverán tarefas vinculadas ao seu ámbito profesional e poderán traballar principalmente en departamentos e servizos da Comisión Europea en Bruxelas e Luxemburgo.
Para a sesión que comezará en marzo de 2027, o prazo de presentación de solicitudes está aberto desde o 22 de xullo ata o 4 de setembro de 2026, ás 10:00 horas (hora de Bruxelas).
As prácticas desenvolveranse entre o 1 de marzo e o 31 de xullo de 2027.
As candidaturas deben presentarse a través da plataforma oficial da Comisión Europea. Cada persoa pode presentar unha única solicitude por sesión e por tipo de prácticas. No caso da modalidade de Formación Profesional, será necesario seleccionar a opción correspondente a ADMIN VET.
O proceso de selección comeza cunha fase de comprobación da elegibilidade e preselección. As persoas que superen esta fase pasan ao denominado Virtual Blue Book, desde onde poderán optar posteriormente a postos concretos de prácticas. A preselección non garante a obtención dunha praza, xa que hai polo menos tres veces máis persoas preseleccionadas que postos dispoñibles.
As prácticas son remuneradas. Para a sesión de marzo de 2027, a contía básica mensual depende do lugar de destino e aplícase un coeficiente corrector segundo o custo da vida. En España, por exemplo, a contía indicativa é de 1.471 euros mensuais, á que poden sumarse determinadas axudas segundo as circunstancias da persoa e o lugar de destino.
Desde Europe Direct Galicia animamos especialmente á mocidade galega, incluídas as persoas tituladas en Formación Profesional, a coñecer esta nova vía de acceso ás prácticas na Comisión Europea e aproveitar a oportunidade para dar os primeiros pasos nunha carreira profesional con dimensión europea.
Prazo de solicitude: ata o 4 de setembro de 2026, ás 10:00 h (hora de Bruxelas).
