Europe Direct Galicia achega á mocidade de Moaña os recursos e oportunidades da Unión Europea
Máis de 40 persoas participaron nun encontro internacional centrado no futuro de Europa, a participación xuvenil e os retos da cooperación internacional
Imaxe: Europe Direct Galicia, 2026
Máis de 40 persoas participaron en Moaña nun encontro internacional que reuniu investigadores, responsables institucionais, estudantes e cidadanía para reflexionar sobre o futuro de Europa, a participación da mocidade, a cooperación internacional e os principais desafíos xeopolíticos actuais.
No marco deste encontro, Europe Direct Galicia presentou diferentes recursos e oportunidades que a Unión Europea pon á disposición da mocidade, achegando información sobre as posibilidades de participación e sobre os instrumentos europeos que poden contribuír ao desenvolvemento de novos proxectos.
A programación combinou conferencias, debates cidadáns, presentacións de alumnado e actividades culturais, favorecendo o diálogo entre o ámbito académico e a sociedade.
Un dos elementos destacados da xornada foi precisamente a participación activa dos mozos e mozas, que presentaron diferentes proxectos orientados a dar resposta a necesidades concretas dos seus territorios e que poden ser susceptibles de recibir financiamento europeo.
O encontro converteuse así nun espazo para coñecer mellor as oportunidades que ofrece a Unión Europea e, ao mesmo tempo, para reflexionar sobre como a cidadanía, especialmente a mocidade, pode participar na construción do proxecto europeo.
